PRESS | Clean Beauty・肌膚脫毒工程

Press: GOODDIG
Published on: 14th August, 2019

https://gooddig.hk/2019/08/14/clean-beauty

Original Content:

追趕潮流往往意味著貪新厭舊，尤其喺時裝美容界，大家都談論緊同一個標籤，Eason都有唱：「當潮流愛新鮮當旁人愛標籤……」。不過唯獨以下呢個topic歷久不衰，就係「Less is more」﹗呢句至理名言，正正同而家美容界最炙手可熱嘅議題Clean Beauty（潔淨美容）不謀而合。Clean Beauty標榜無毒護膚，乍聽同近年美容界長期吹捧的天然有機風性質相近，然而兩者其實大有不同。今次好𢯊就以Clean Beauty為題，提提大家標籤事物之前記得睇清楚標籤先再標籤！

乜嘢係Clean Beauty？

好𢯊女子可以抵抗各種「獨」性，唯獨係「毒」性就萬萬不能﹗今時今日，由頭到腳、由外到內，我哋都被不同程度的化學物無時無刻包圍住，有毒物質無孔不入。由奧斯卡影后Gwyneth Paltrow推動的Clean Beauty運動，正正就想抵抗呢股風潮。Gwyneth早年所創立的有機保養品牌 Juice Beauty，早以無毒概念推出美容護理產品。本為美容insider先知道的小眾運動，經不少名人支持及推廣後逐漸成為主流；甚至被美版《VOGUE》選為2018年最重要美妝趨勢之一，編輯們更豪言「Natural will give way to Clean 」﹗

雖然Clean Beauty熱潮席捲全球，但到目前仍未有一個非常統一的定義。簡單去理解，要成為Clean Beauty產品，不論成分係純天然，抑或人工合成，都必須符合以下三個準則：安全無毒、透明標示、環境永續。意思即使產品聲稱成分100％天然有機，若然未能証明成分來源，或會否影響健康或刺激皮膚，例如含激素、致癌物此等「有毒成分」，都一論不得歸納為Clean Beauty。

邊啲係有毒成分？

一講到有毒成分，大家即刻頭都大埋。世上有千百萬種成分，究竟如何分辨係劇毒定偽毒？幸而不少國外品牌都提供有毒成分database供大家參考，例如美國品牌 Beautycounter，喺產品嘅設計原則中列出 1,500 項的禁用成分表（the never list™ ），又或早已人所皆知的Think Dirty都是不錯的選擇。想再簡單啲？Fine﹗大部分Clean Beauty 產品都不含羥基苯甲酸酯（Parabens）、聚乙二醇（PEGs）、甲醛（Formaldenhyge）、礦物油、硫酸鹽（Sulfates）、乙醇胺（Ethanolamines）、鄰苯二甲酸酯（Phthalates）、三氯沙（Triclosan）、甲基異噻唑啉酮（Methylisothiazolinone）、合成香料和化學防曬劑。皆因以上全屬會令皮膚過敏、堵塞毛孔，甚至會引起乳腺癌或生殖問題。

點分Clean Beauty、天然、有機產品?

睇到呢度，可能會有人疑惑究竟Clean Beauty同天然、有機產品有乜分別？當中最大分別就係Clean Beauty產品係唔會理成分是否全天然、無添加與否，而係著重產品的成分和功效，對皮膚無負擔亦無損害。而天然、有機產品的分別在於前者的成分全屬純植物和自然成分，而且加工程度極低。產品質素好壞完全視乎原材料本身種植、處理和後期製作方法。如果種植原材料的土壤或種植方法受到污染，之後製成的護膚品可能會帶有害物質，對肌膚或受成傷害。相對有機產品，縱然成分和天然產品大致相同，但有機產品對原材料的產出要求十分高，包括種植、飼養、收穫、生產等方面均不使用化學除草劑、殺蟲劑、殺真菌劑或抗生素，務求產品做到零污染。簡而言之，三者賣點各有不同，如果閣下自認係一個懶到出汁，對所用產品成分冇乜求知慾，但又好驚死怕會慢慢中毒，Clean Beauty絕對係你不二之選，一條龍服務幫你同你皮膚齊齊脫毒！